بحب منير جدا, صدقونى لا هى منظرة ولا عشان أعمل نفسى مثقف, منير صوت مصرى جدا ومن أول ما سمعته دخل قلبى دغرى وحفظت كلام أغانيه, والعادة لما بتحفظ كلام اغانى حد وبتمسعه دايما كلامه بيسكن عقلك الباطن فستستشهد بيه من غير ماتحس

والنهاردة كنت على موعد مع أنى اسمع وجيه عزيز فى نقابة الصحفيين, لاقيت هناك حزمة مدونين محترمة الافغانى ومالك و نذير العاصفة, والصديق اللى كنت قارفه من أول النهار وهارى دماغه رغى وهو ما اشتكاش عمرو عزت, كانت جنبى صديقة بريئة جدا, ولسه فيها نقاء الطفولة, وكل شوية تتلفت وتبص فى الساعة, فقلتلها  دق الساعات بيخنق حاجات, واكتشفت من نظرة التعجب اللى طلعت من عينيها من غير تمثيل انها فعلا ما سمعتش الاغنية, و ردت وقالت انها مش عارفة حاجة, بصراحة كان نفسى اسمعها لها بس صوتى وحش جدا جدا

عامة يمكن تدخل هذه الصديقة وتشوف الكلام ده وتحاول تسمع الاغنية

اهى الاغنية يا ستى عشان تعرفيها وما تحسيش انك مش عارفة حاجة

الاغنية كلمات كوثر مصطفى والحان عمرو مصطفى ( مش أخوها وبلاش الاسئلة الغبية دى) و طبعا بصوت محمد منير