مرثية لواحد ما عرفش يتولد

الفاترينة الإزاز بتقتل, معلومة متأخرة وصلتك بعد ما أكلتك

" بدأت تنمو من العينين
وأوهموك بأنها للحفظ
فهل سمعت عن حفظ لحى ؟"

تضحك, وتدور فى كل جداول الكشوف الأثرية ما تلاقيش ابدا موميا لحد عايش
من العينين للانف للفم
بعد الفاترينة صوتك له مذاق خاص
والكل أجمع أنه إحلو
من خلف الاسلاك بيختلف الرنين وتتغير النغمة، زى صوت أم كلثوم تسمعه من الاذاعة مش من الازبكية
والنمو مش بيقف، بيسكنك الإزاز من جوة ومن برة
بيحافظ ع النظام ويرابض للامام
الإتزان دايم، لاشئ دخله ولا شئ راح يدخله
والخروج م الاصل ممنوع
يا وكستك... لاصادر ولاوارد
ومفيش حل

لكن الفاترينة بتنفد ضوء
كل علاقتك بالاحياء الظل
إطمن بعد شوية الإزاز هيكبر أكتر، وهترتاح حتى من الخيال

من ضفة لضفة عمال بتعدى
وما حدش حتى فكر يخبط فى جسمك كتف
منادى السيارات بينظم المرور
وبيخلق للجميع أعذار
 
معلش ما بيعرفش يكسر

وانت فتيسك يدوى مفيهوش الكسر
والفاترينة بتكبر وبتاكل وبتشرب
والكل من برة بيتفرج فرحان

"
الفرحون يعاينون السعادة
والحزانى يرون نور الرب
ومملكتك بالتأكيد مش من هذا العالم
فأصعد واتهنى بالفردوس

"

5أغسطس 2007